FEIRA DE CIENCIA

 

    Ola!

    A Feira de Ciencia deste ano celebrouse nun día moi primaveral. Este curso decidimos levala ao exterior do cole e desfrutamos dunha xornada cálida e tranquila.

 

    Como cada ano, tentamos que a feira estivera enmarcada no noso PDI, polo que nesta ocasión fixemos que as propostas escollidas xiraran entorno á idea "Facendo comunidade". Para todo isto, tiramos do fondo da nosa BiblioSouto e traballamos a publicación dos irmáns Roca Las deliciosas aventuras de los hermanos Roca. Despierta la curiosidad científica a través de la cocina.

    Que mellor, para facermos comunidade, que compartir mesa e mantel? As propostas coas que traballou o alumnado voluntario de 5º e 6º estiveron relacionadas coa cociña. Porque a cociña é, aparte dun lugar onde compartir e vivir, un laboratorio, onde podemos experimentar e aprender.

    Coñecimos máis sobre as densidades, comprobamos como se fan as emulsións e saboreamos uns apetitosos petiscos de emulsión de aguacate e lima.

    Tamén descubrimos por que nos fai chorar a cebola e cales son os trucos para evitalo. E puidemos probar unhas minipizzas con base de cabaciño e sofrito de cebola e outras verduriñas.

    Coñecimos o almidón, as súas funcións dentro do noso organismo, como se comporta a nivel molecular, e como detectalo en diferentes alimentos. Ademais, cociñáronnos unhas deliciosas galletas de boniato cheas de enerxía grazas ao almidón que contén este tubérculo.

    Agora sabemos cal é a diferenza entre flavor e olor xa que nos propuxeron xogos con diversos alimentos que ulimos e saboreamos. Tamén puidemos sentir a diferenza entre o olor das pizzas cociñadas ben quentiñas e as que aínda estaban sen cociñar. Canto fai o calor! E, por suposto, saboreámolas.

    Xogamos e experimentamos con fluídos entre sólidos e líquidos (fluído non newtoniano, flan...), e probamos un deles: a deliciosa xelatina de amorodos!

    Coñecimos o motivo polo que o pan infla, vendo a diferenza dunha masa con e sen lévedo. Que ricas estaban esas pizzas! E canto amasaron as nosas compañeiras de 6º para todas nós!

    Aprendemos sobre os estados da materia, a través da observación e da experimentación con reaccións químicas. E puidemos probar e refrescarnos cun xeado de plátano e amorodo. 

    Grazas ás familias que viñeron colaborar na tarde previa para que a parte da cociña estivera lista no día da feira para podermos ofrecer case douscentos petiscos de cada receita. 

    E moitas grazas ao alumnado participante por facer posible ese día e ensinarnos que aprender é moito máis divertido e saboroso en comunidade! 

Para ver outras entradas relacionadas, preme na seguinte imaxe: