DOROTHÈ SCHUBARTH

 

Dorothé Schubarth con dúas veciñas de Santiago de Mens, Malpica. Arquivo do Museo do Pobo Galego.

    Ola!

    Queremos compartir con vós unha recomendación interesantísima. NON está pensada para crianzas, pero as adultas das familias que poidades achegarvos de seguro que vos encantará.

Espectáculo "586 Cantos", Teatro Colón, A Coruña. Fonte: Museo do Pobo Galego

    "586 cantos" é un espectáculo audiovisual creado a partir das gravacións que realizou Dorothé Schubarth percorrendo Galicia a finais dos anos 70 e recollendo un arquivo etnomusicolóxico exquisito. Dorothé quixo donar todo o seu traballo ao Museo do Pobo Galego para que este o preservara e o difundira.

    Este espectáculo que montaron as cineastas Laura Piñeiro e Fran Rodríguez Casal inclúe, ademais desas gravacións, fotografías, partituras e transcricións de textos; música en directo da man do mestre e músico Richi Casás acompañado por Tania Caamaño, Marina Vidal e Fran Barcia.

Teresa, Prudencia, Manuela e Adela en Mens (1982). Imaxe extraída da páxina web da Real Academia Galega.

     Deixámosvos información sobre a seguinte data e lugar para que non perdades os "586 cantos" e poidades desfrutar deles tanto como nós o fixemos. Podedes seguir a páxina web do Museo do Pobo Galego para irdes actualizando ditas datas.

21 de marzo en Carballo

23 de maio en Cerceda

       

    Recomendámosvos tamén o filme Dorothé na vila, que podedes ver na plataforma FILMIN, onde Olaia Tubío e Alejandro Gándara seguen os pasos de Dorothé Schubart visitando, na actualidade, a moitas das persoas que Dorothé gravou nos anos 70.

    Vémonos pola biblio!